ಅವರೆಂಬ ಮಧ್ಯಮರು

ಅಲ್ಲಿ 

ಕೂಗಿದೆ,ಅಳಲಿದೆ

 ಕರುಳಿನ ತೊಳಲಾಟವಿದೆ

ಅದೆಷ್ಟೋ ವರ್ಷಗಳ ತಪಸ್ಸಿದೆ

ಕೊಳೆಯಾದ ಪಂಚೆಯ ಎಡೆಯಲ್ಲಿ, 

ಉಸಿರುಗಟ್ಟಿದ ಆಸೆಗಳಿವೆ !

ಅಲ್ಲಿ,

ಬದುಕು ಬಿದಿಗೆ ತುಂಬಲಿಲ್ಲ, 

ಬಸಿರು ಬದುಕಲಿಲ್ಲ

ಬಸಿಯಲಿಲ್ಲ , ಬೆಸೆಯಲಿಲ್ಲ

ಬಣ್ಣಿಸುವಷ್ಟು ಬಣ್ಣಗಳಿಲ್ಲ

 ಆದರೂ ಇವರು ಸಮರ್ಥರು!

ಇಲ್ಲಗಳನ್ನು ಅಲ್ಲಗಳೆದು

ಇಂಗಿದ ಇಂಗಿತಗಳ ಜೊತೆಗೆ 

ರಾಜಿಮಾಡಿದ್ದಾರೆ!

ನೀವು ಕೊಡುವ ಮಾತು,

ಮೌನವಾಗಿ ಮರೆತಿದ್ದಾರೆ,

ಅವರ ಬೆವರಿನ ಘಮಕೆ

ನೀವು  ಬಂಗಲೆ ಕಟ್ಟಿದರೂ

ಅವರು ದನಿ ಎತ್ತಲಾರರು,

ರಾಜೀನಾಮೆ ಬಯಸಲಾರರು!

ಈ ಅವರುಗಳು ಯಾರೆಂದು ಪ್ರಶ್ನೆ ಯೇ ಏಳುವುದಿಲ್ಲ

ಇವರು ಸರಾಸರಿಯ ಅಂಕಿಅಂಶಗಳಲ್ಲಿ ಸಾರಾಸಗಟು

ಸಪಾಯಿಯಾಗಿದ್ದಾರೆ

ಆದರೂ ಸಿಪಾಯಿಯಂತಿದ್ದಾರೆ

ಬೆಳವಣಿಗೆಗೆ ಬೆಳೆಯದೇ ಹೋದರು, ಬಲಿತಿದ್ದಾರೆ

ಮತ್ತು ನಿಮ್ಮನ್ನು ಬೆಳೆಸುತ್ತಿದ್ದಾರೆ!!

~Geethalakshmi Kochi